Arte+Escuela

A lo llargo del cursu escolar 2025-26, en collaboración cola Bienal Climática d’Avilés, desenvolvimos tres proyectos d’arte+educación y radio en tres aules de centros educativos públicos de primaria y secundaria de Piloña y Cabranes. Trabayamos col profesoráu y l’alumnáu alredor de temes vinculados a la crisis climática y nos visitaron artistes que nos ayudaron a pensar, xugar y crear dende l’arte y la imaxinación.

Préstanos pensar les escueles como centros culturales, quier dicise, espacios nos que tamién podemos crear y participar de la vida cultural. Les infancies y adolescencies tienen muncho que dicir y aportar sobre los retos contemporáneos. Amás, la escuela, y sobre too, la escuela rural, ta perconectada col territoriu qu’habita, daqué fundamental a la hora de falar sobre crisis climática. La crisis climática ye, porriba de too, una crisis ecosocial, y la escuela puede ser esi espaciu nel que volver a conectar cola contorna, y facelo dende una mirada crítica y artística.

Les clases de 4º, 5º y 6º de primaria del CRA La Coroña escribieron radioficciones inspiraes n’espacios industriales abandonaos de Piloña. L’artista Alba Matilla ayudónos a conectar estos paisaxes industriales con seres de la mitoloxía asturiana y retos de la crisis climática.

La clase de 5º de primaria del CEIP L’Ablanu creó un xuegu cooperativu de cartes cola artista Raposu Roxu llamáu ¡GUACAMOLE! pa pensar sobre cómo nos relacionamos cola naturaleza col xuegu simbólicu. Al final, escribimos y grabamos poemes inspiraos nel día a día de la vida de ciertos animales.

La clase de 1ºESO del IES Infiesto creó una ficción sonora alredor del maíz, los usos, oríxenes y la relación cola fiesta tradicional del Antroxu, pa reforzar los vínculos de la escuela con esta tradición. L’artista Sara García ayudónos a repensar la nuestra relación cultural y simbólica col maíz, creando máscares de personaxes feches con elementos d’una panoya.

El proyectu dividióse en tres fases. La primera consistió en co-diseñar la propuesta ente’l mediador y el profesoráu p’aterrizar el tema a investigar y asitiar el proyectu en cada aula. La segunda fase implementóse a lo llargo de 12 sesiones en cada centru. Nesta fase organizamos delles salíes fuera de los centros y tuvimos 2 alcuentros coles artistes. Nesta etapa creamos los conteníos radiofónicos que mostramos nel Parque Ferrera d’Avilés por cuenta de la inauguración de la Bienal Climática. Celebramos el cierre y última fase del proyectu con un programa emitíu en directo de Radio Barullu (la radio de La Benéfica de Piloña) cola collaboración de Radio Kras. En Creamos un monstruo, el nome d’esti programa especial, acompañáronnos estudiantes, profesores, artistes y responsables de la Bienal Climática y foi una recoyida d’aprendizaxes, esperiencies y sentires sobre’l proyectu. Puedes escuchar el programa directamente calcando equí o na pestaña de programes de la web de Radio Barullu.